鈎織的針法包括花式配搭就已經可以超過900款式！有無去一些書店了解過一些作者會集合部份針法，標題都離唔開「過百款鈎針花樣全集」的字眼﹖會唔會一望上去就已經無晒動力﹖

其實我們最常用的鈎織針法大約在於20款左右！打個比方，如果我的目標只係想學掂人型公仔，最基礎你起碼要識得點樣睇圖解！圖解就好似奶粉一樣，而針法係開水！而要學掂人型公仔只需要4款以內的基礎針法就可以做得到！

當然！當你一出世，你需要慢慢成長，過多幾個月，就可以食糊仔！就好似你要先認識圖解係咩黎、點睇法﹖如何拎鈎針先係最正宗又唔會鈎壞個手勢！繼而你開始學鈎基礎針法，明白當中的原理，然後你會做出作品！而作品的面世讓你十分有成功感時，你會想繼續更深地去探索進階的針法，你會渴望對作品作出改善、修改，成為你的設計！

而至於點解我唔單刀直入學我想學的作品仲好呢﹖當然你可以自由作出呢個選擇，但你有無試過去上堂學一個公仔時，當老師在旁時，你非常之清晰如何運作！但一返到家中，你會手停眼停﹖然後就開始拎起你的電話，開始whatsapp你的導師，然後問：「Miss！我唔記得左點樣數針﹖我下一步應該點樣做﹖我唔知自己做到邊﹖下一針係咪督呢針呢﹖」但當你再上返堂的時候，你又好似清楚返自己做緊咩步驟呢﹖這些問題係咪似曾相識呢﹖﹖﹖

過去開實體工作坊的時候，我確實遇唔少這類的學生，這並不代表他/她們遲鈍，只是對「基礎」呢兩個字唔明白而已。因為學一樣作品有一定的堂數及時間的限制，學生要同時了解如何睇圖解、繼而要明白如何運用雙手調節拎毛冷及鈎針的鬆緊度、仲要學埋點樣加入棉花的技巧，要學生同時輸入大量原理，而因為課堂時間問題等等，學生只會要求加堂，增加自己的上堂成本！

好多時候我們會走捷徑，想快啲去完成，但出黎的效果係咪我哋想要的呢﹖所以不要輕看「基礎」這兩個字呢！